LAOAG CITY – Naiget ti iwaywayat nga inspeksion ti Business Permit and Licensing Office kadagiti negosio dagiti nagduduma a barangay ditoy siudad ti Laoag.
Segun ken ni Atty. Charito Malicad, Officer in Charge iti nasao nga opisina, adda ti panagkinnammayetda kadagiti amin a kapitan ditoy siudad tapno mailistada dagiti amin a negosio iti sakupenda a barangay a daytoy ti agbalin a pagibasaran wenno suroten no dagitoy ket mangisayangkatda ti inspeksion.
Inbatadna nga adda ti sumagmamano ti nagisubmitir kadakuada ti listaan maipanggep iti daytoy a banag.
Inlawlawagna a nupay bassit laeng dagiti nagisubmitir kadakuada ti listaan ket saan met daytoy ti agbalin a lapped tapno saanda a mangiyuswat ti inspeksion kadagiti negosio kadagiti amin a barangay ditoy siudad.
Innayonna a gagem ti opisinada a ma-monitor a nasayaat dagiti negosio, nakareshistro man wenno saan para iti nataltalged a panagnegosio dagitoy.
