LAOAG CITY – Nagbalin a limitado ti panagkomento ni Vice Mayor Maynard Francis Bumanglag iti ili ti Pinili maipanggep iti isyu a sangsangoen ni Mayor Rommel Labasan.
Segun kenkuana, gagangay laeng para kadakuada nga opisial ti gobierno nga adda dagiti maibatbato nga isyu kontra kadakuada.
Inbatadna a mamati a saan a napintas ti ar-aramiden ti gobierno no awan ti mangkritkritikar kadagiti ar-aramidenda kas maysa nga agpanpanday linteg.
Inlawlawagna a para kenkuana, no adda ti maob-obserbaranda iti garaw wenno tignay nga ar-aramidenna ket adda ti mapaspasamak a nasayaat.
Kunana nga aniaman dagiti isyu a maibatbato iti maysa nga opisial ket siguradoenda a saan a maapektaran ti trabaho daytoy.
Innayonna a nagbalin met a balligi ti naisayangkat a taripnong kaduana dagiti padana nga opisial ti Vice Mayors League of the Philippines.
Maipalagip nga adda ti naipatulod a surat ditoy Bombo Radyo Laoag no sadinno a kalikagum ti agrekreklamo a paimbestigaran ti kinabaknang ni Mayor Labasan gapu ta patienna a kwestionable ti inusar ti Mayor iti panagpatakder kadagiti negosiona.
