LAOAG CITY – Inpakaammo ni Mayor James Bryan Alcid a ti revenue ti P20-M a kidkiddawen ti Executive Branch ket posible nga agsubli ti mamin-30 a daras.
Segun kenkuana, adda ti naisayangkat a panagsukisok ken nagsalsaludsodda maipanggep iti daytoy a banag.
Inbatadna a kalikagumna a tuladen dagiti dadduma a lugar kas idiay Davao a napasublida ti sumurok 250 milyon a pisos manipud kadagiti insayangkatda nga aktibidad.
Inlawlawagna a daytoy a revenue ket saan a sumrek iti city government no diket para iti ad-adda pay a panangpasayaat ken panangpapintas iti benneg ti turismo ditoy siudad ti Laoag a pakabenepisiaran dagiti hotel, restaurant ken establishimento a mangakomodar kadagiti bumisita ditoy siudad.
Kunana a babaen iti ilunglungalongda a gakat ket ad-adda a magutigot dagiti turista ken gangannaet a napapaut nga agtalinaed ditoy siudad ti Laoag tapno dakdakkel met laeng ti mapastrek ti siudad.
Innayonna a dagiti makipaset iti triathlon event ket manipud iti sumurok 30 a pagilian.
Maipalagip a ti nasao a resolusion ket nasertipikaran kas urgent no sadinno nga apaman a naidasar daytoy ket saan met a nasungbatan a naimbag ti Executive Branch dagiti saludsod manipud kadagiti sumagmamano a konsehal.
