LAOAG CITY – Umabot iti innem a ribu a personnel ti Philippine National Police (PNP) ti manamnama nga i-deploy iti aglawlaw ti Senado para iti impeachment trial ni Vice President Sara Duterte inton Lunes.
Inbatad ni Philippine National Police Public Information Officer Chief PCol. Allen Rae Co a naidatagen ti comprehensive security plan ti nailian a pulisia para iti nasao nga aktibidad.
Kunana nga ita a malem ket mangisayangkat ti conference ti amin nga units ti pulisia para iti pinal a security plan.
Mainaig iti daytoy, kuna ni Co nga awan pay ti naawat a request ti Philippine National Police manipud iti Senado para iti deployment dagiti kapulisan iti uneg met ti Senado.
Innayonna a maadal inton Lunes no agipangato ti alerto ti Philippine National Police iti nasao nga impeachment trial.
