LAOAG CITY – Nakaawis ti atension dagiti Japanese soccer fans iti FIFA World Cup, saan a pakaistoryaan ti gulo no diketdi ti panagdalusda iti stadium kalpasan iti tunggal laban ti teamda.
Mangabak man wenno saan, dagiti Japanese supporters ket agpidpidot da ti basura pakairamanan dagiti plastic cups ken food trays a naibati kadagiti tug-tugaw ken sigsiguradoenda a nadalos ken awan ti rugit ti venue sakbay da a talawan.
Bayat iti panagsuportarda ti teamda iti FIFA World Cup ket adda ti iggem dagiti agbuybuya a japanese soccer fans a plastic bags nga addaan ti nakasurat a Japan pride nga iso ti iwagwagaywayda no iggem ti teamda ti bola wenno kada maka-goal dagitoy. Ket no malpas ti kada laban ket usarenda dagiti plastic bagsda a pagibsuraan kadagiti nabati a wara.
Ti nadakamat a panagdalus dagiti Hapon kadagiti venue no kada malpas ti ay-ayam ket nabayagdan nga araramiden’en idi pay laeng tawen 1998 a nagbalin a paset ti tradisiondan tunggal makastrek ti teamda kadagiti major tournments.
Gapu iti daytoy ket ado ti mangibagbaga nga adda pakainaiganna daytoy iti cultural habit dagiti Hapon no sadinno ket mabigbigbig ida nga adda ti respetoda iti shared spaces a naipaulo kadakuada bayat iti panagbasada.
