LAOAG CITY – Nagballaag ti Department of Education a saanen a palubusan a makaenrol iti sumaruno nga school year dagiti estudyante nga agar-aramid ti bomb threat wenno uray iti bomb joke.
Segun iti Department of Education, karaman daytoy iti third level offense, ti kangatoan a lebel ti panaglabsing gapu iti mangitunda daytoy ti panagpanic, maistorbo ken maitantan ti klase ken mabalin pay nga agtungpal iti kaso kriminal.
Inbatad ni Education Secretary Sonny Angara a kaanuman ket saan a rumbeng nga ibilang nga angaw ti bomb threats, napeggad a prank, ken fake news gapu ta maikabil iti risgo ti seguridad dagiti agad-adal ken maapektaran ti panageskwela da.
Iti babaen ti DepEd Order No. 006, series of 2026, ti umuna a panaglabsing ket agresulta iti non-readmission, no sadinno a malpas ti estudyante ti agdama nga school year ngem saanen a makaenrol iti sumaruno a tawen ken mairefer kadagiti maseknan nga ahensya ti gobierno.
Ti maikadwa a panaglabsing ket agtungpal iti dagus nga exclusion wenno pannakaikkat iti pagadalan.
Kabayatanna, ti panagiwaras ti fake news wenno prank a mangitunda iti pannakaulaw iti pagadalan ket maibilang a minor offense ken adda ti maiyannatop a pannusa depende iti kaado ti panaglabsing.
Inparuk-at ti Department of Education ti ballaag kalpasan a nagwaras ti fake news mainaig iti maipagarop a pammaltog iti Bagong Silangan High School iti Quezon City, a nangitunda ti panagpanic dagiti nagannak ken estudyante.
Rumrumuar iti imbestigasyon a maysa a napigsa a ringgor manipod iti kaabay a construction site ti napagkamalian a putok ti paltog idinto nga agtultuloy ti panangdeterinar dagiti otoridad ti naggapwan ti fake messages.
