LAOAG CITY – Umabot iti 40 ti natay idinto a walo ti nasugatan kalpasan a natnag iti derraas ti maysa a napaspas ken overload a pampasahero a bus idiay Pakistan.
Naawanan ti kontrol ti bus ken natnag iti derraas iti Dana Sar a maysa a nasulinek a lugar nga asideg iti nagbedngan ti probinsia ti Balochistan ken Khyber Pakhtunkhwa.
Basar iti imbestigasion, malaksid iti orihinal a pasaherona, inlugan pay ti bus dagiti pasahero manipud iti maysa pay a bus a naperdian isut gapuna nga overload ti karga ti lugan.
Segun ti maysa kadagiti nakalasat, maipagarup a naaddaan ti riri iti uneg ti bus kalpasan a nagsardeng ti driver tapno mangilugan pay ti nayon a pasahero.
Mapapati nga adda ti maysa a pasahero a nangdanog iti tengnged ti driver rason a saanna a nakontrol ti manibela a nangitunda ti pannakatnagna iti derraas.
Agtultuloy nga iberberipikar dagiti pannakabagi ti linteg no pudno ti statement ti maysa kadagiti nakalasat.
