LAOAG CITY – Balligi a naarestar dagiti aglive in partner iti Barangay 55-B Salet Bulangon iti siudad ti Laoag kalpasan ti maysa a buy-bust operation.
Ti naisayangkat a drug buy-bust operation ket naipatungpal babaen iti panagbibinnulig ti Philippine National Police Laoag, Provincial Drug Enforcement Unit ken ti Philippine Drug Enforcement Agency.
Binigbig dagiti otoridad ti suspek a lalaki nga agtawen ti 54, maysa a tricycle driver idinto a ti live-in partner na ket 52, residente metlaeng dagitoy iti nadakamat a barangay.
Inbatad dagiti otoridad a bayat ti pannakaiwayat ti operasion ket nakumpiskar iti maysa a pedaso ti heat-sealed transparent sachet a maipagarup naglaun ti shabu a nailako iti nagpammarang a police poseur buyer.
Iti panangkapkap dagiti otoridad kadagiti suspek ket nakumpiskar da pay ti innem nga heat-sealed transparent sachet a naglaon metlaeng ti maipagarup a shabu, dua a cellphone, brown wallet a naglaon ti driver’s license, resibo, 1,000 peso bill a nausar kas buy-bust money, P1008 a personal a kuarta ti suspek, maysa nga tricycle, sling bag ken lighter.
Nagtalinaed dagiti suspek iti Philippine National Police ditoy ciudad ti Laoag kabayatan ti pannakaisagana ti maipila a kaso a panaglabsing iti Republic Act No. 9165 wenno Comprehensive Dangerous Drug Act of 2002 kontra kadakuada.
