LAOAG CITY – Pinalubusan ti Sandiganbayan Second Division ti panangibabawi wenno withdrawal ni Senador Jinggoy Estrada iti mosyon na nga agkidkiddaw ti furlough wenno temporary a pannakawaya-waya manipod iti pagbaludan tapno agatendar iti impeachment trial ni Vice President Sara Duterte.
Gapu iti daytoy, ti pammalin ti korte a mangibilbilin iti prosekusyon a mangisumitir ti komento ket opisyalen a naibabawi ken naideklarar kas moot and academic.
Basar iti manifestation nga inpila ti kampo ni Estrada, adda ti panagkamali gapu ta ti mosyon ket naipasa iti Second Division imbes nga iti Fifth Division ti Sandiganbayan.
Ti Fifth Division ti addaan ti hurisdiksyon iti ayanna a pagbaludan gapu ta daytoy ti mangig-iggem iti kaso na a plunder a non-bailable mainaig iti maipagarop a maanomalya a flood control projects.
Nupay nagpiyansa ni Estrada ti ₱90,000 para iti sabali a kaso na a graft iti babaen ti Second Division, nagtalinaed a nakabalud iti New Quezon City Jail iti Payatas gapu iti kaso na a plunder iti Fifth Division.
Agdama a dumaldalan ni Estrada iti 90-day preventive suspension nga inpatungpal ti Senado sipud idi Hunyo 22 ita a tawen, no sadinno a basar iti liderato ti Senado, ti pannakasuspenso ti senador ket kayatna a sawen, saanen a makapagtugaw kas senator-judge iti agtultuloy nga impeachment trial ni Vice Presidente Sara Duterte kabayatan a maipatpatungpal ti pammilin.
