LAOAG CITY – Naarestar ti 3 a Construction Worker iti ili ti Dingras kalpasan a nakitaan dagitoy ti maipagarup maipawil a shabu.
Dagiti suspek ket agtawen 37 ken 31, construction workers ken agpadada a residente ti Barangay Albano iti ili ti Dingras idinto a ti maysa pay ket agtawen 23, awanan asawa, construction worker ken residente ti Barangay 5-B Pagsanaan Norte iti ili ti Badoc.
Nakemmeg dagiti suspek kalpasan ti panag-drag racingda iti bypass road nga asideg ti Barangay Guerero iti met laeng ili a nakaarestaranda.
Iti baet ti panagmanehoda, nakita a natnag manipud kadagiti suspek ti maysa a heat sealed transparent sachet a naglaonan ti mapapati a shabu idinto nga adda pay nakita dagiti otoridad a maysa pay a heat sealed transparent sachet a naglaonan ti puraw a crystalline substance a maipagaup a shabu.
Kabayatanna, malaksid iti kaso nga RA 9165 a naipila kadagiti suspek ket naissuean pay dagitoy ti citation ticket gapo iti panag-drag racingda.
