LAOAG CITY – Pormalen a nalukatan ti geriatric center ti Mariano Marcos Memorial Hospital and Medical Center iti siudad ti Batac.
Daytoy a pasdek ket pito a kadsaaran a pakaipanan ti nagduduma a departamento kas ti eye center, sub special, general Intensive Care Unit, wards ken dadduma pay.
Segun ken ni Dr. Helen Tobias, ti Department of Health – Region 1, babaen ti pannakairubuat ti baro nga health facility ket maipadanon ti napinpintas a serbisio medikal kadagiti pasiente.
Inbatadna a saanen a kasapulan dagiti pasiente nga agturong ti adu a klinika iti sumagmamano nga aldaw gapu ta addan ti maysa a baro a pasdek a mangakomodar ken mangtaming kadakuada.
Inlawlawagna a saanen a masapul pay nga agturong idiay Manila tapno agpaagas gapu ta kumpleton dagiti maididiaya nga heath services iti nasao a pasdek.
Kabayatanna, inpakaammo ni Medical Center Chief II Dr. Maria Lourdes Otayza a dakkel a tulong para kadagiti natataengan nangruna kadagiti senior citizen a masansan nga agsagsagaba ti agsasaruno a sakit ti geriatric center.
Inpanamnamana a sakbay nga agngudo ita a tawen ket naan-anayen nga operational ti geriatric center gapu ta adda pay ti sumagmamano a manarimaan a maiplasplastar iti pasdek.
Innayonna nga iti agdama ket adda ti 128 a bed capacity isut gapuna a nagkiddawda pay ti nayon tapno ad-adu ti maakomodarda a pasiente.
