LAOAG CITY – Pinaigetan dagiti otoridad ti panagsagana iti posible a panagputok ti Bulkan Mayon pakairamanan ti inspeksion kadagiti evacuation center, pannakaikabil dagiti responder ken panangipaay dagiti pakdaar iti publiko.
Segun kadagiti residente, nakasaganada ti bado, kuarta ken dadduma pay a napapateg a ramit no kasapulan ti panagibakwit.
Kunada a napigpigsa ti agdama a panagalburuto ti bulkan ngem iti napalabas a bulan.
Nagtaripnong ti gobierno lokal ti Sto. Domingo kaduana dagiti sabali nga ahensia tapno repasoen ti evacuation plan ken ipasigurado a nakasagana dagiti evacuation center.
Kabayatanna, adda naka-duty a pulis ken suldado kadagiti checkpoint iti Camalig tapno bantayan ti situasion ken ipatungpal ti panangipawil iti panagserrek iti danger zone.
Mainaig iti daytoy, nangipaulog ti pakdaar ti Department of Health (DOH) Bicol kontra kadagiti peggad kas ti lahar, panaglang-ab ti abo, kontaminado a danum ken dadduma pay a posible a peggad.
Inpakaammo ti Philippine Institute of Volcanology and Seismology (PHILVOCS) ken Philippine Atmospheric, Geophysical and Astronomical Services Administration (PAGASA) iti publiko nga agtultuloy a suroten dagiti pakaammo ken mangisagana ti emergency go bag, liklikan dagiti karayan a pagayusan ti lahar ken insigida a suroten ti bilin ti panagibakwit no kasapulan.
