LAOAG CITY – Inrakurak ni Ombusman Jesus Crispin Remulla a dandanin a malpas ti opisinada ti fact-finding investigation kontra ken ni dati nga House Speaker Martin Romualdez mainaig iti maipagarup nga iregularidad iti flood control projects.
Segun ken ni Remulla, dandanin iti panangipilada ti kaso a plunder ngem siguradoenda pay laeng a makumpleto ken natibker ti amin nga ebidensia sakbayda nga ipila iti korte.
Saan pay laeng nga inbatad ni Remulla dagiti ebidensia nga iggem ti Ombudsman ngem kunana a tingitingenda ti maipagarup a budget insertion nga inaramid kalpasan a naaprobaran ti 2025 national buget.
Inpettengna ti posible nga agbalin nga state witness ni dati a Public Works Secretary Manuel Bonoan tapno mapapigsa ti kaso.
Malaksid ken ni Romualdez, kuna ni Remulla nga adda pay ti sabali nga agpanpanday linteg a maipadalan iti fact-finding investigation mainaig iti isyu iti flood control kabayatan nga agtultuloy latta ti imbestigasion ti reklamo nga inpila kontra ken ni Senador Francis ‘Chiz” Escudero ken Senador Joel Villanueva.
Inpaganetget ni Remulla nga uray man gagem ti publiko a mapaalisto ti proseso, kasapulan a suroten ti umno a proseso ti linteg tapno masigurado a natibket dagiti kaso nga ipila.
