LAOAG CITY – Immadu ti bilang dagiti senior citizen ditoy pagilian, basar iti resulta ti 2024 Census of Population.
Rimmuar iti census nga umabot iti 112.33 million ti pakabuklan a populasion ti pagilian.
Ti nasao a bilang, 10.2 a porsiento wenno maysa iti tunggal 10 a Pilipino ket senior citizen a nangatngato daytoy ngem idi 2020 no sadinno 8.5 a porsiento laeng ti natataengan.
Basar iti Census of Population (POPCEN), ipakpakita daytoy ti agtultuloy a tumataeng ti populasion iti pagilian.
Ngimmato ti median age dagiti Pilipino manipud 25.3 tawen idi 2020 iti 27.7 tawen idi 2024.
Kabayatanna, umabot iti 42.10 million wenno 37.5 a porsiento ti populasion dagiti agtawen ti 5 agingga 24 wenno dagiti adda ti school age a naat-atiddog daytoy ngem iti nairekord iti 2020.
Inpakita iti census nga immadu ti lallaki ngem ti babbai iti pakabuklan a populasion no sadinno addaan ti 56.68 million ti lallaki ken 55.65 million ti babbai.
Ad-adu ti lallaki a 0 agingga agtawen ti 54 ken ad-adu met ti babbai nga agtawen ti 55 agpangato.
Basar iti census, at-atiddog ti biag dagiti babbai isu nga isuda ti kaadoan kadagiti natataengan.
