LAOAG CITY – Natay ti maysa a seaman kalpasan a naidungpar ti naglugananna a motorsiklo iti maysa a kongkreto a poste iti Barangay 31, Talingaan ditoy siudad ti Laoag.
Ti biktima a nangiturong ti motorsiklo a Kawasaki ket agtawen ti 24, residente ti Barangay 32-B Lapaz ditoy siudad ti Laoag.
Basar iti inisyal nga imbestigasion, ti nakamotorsiklo ket agturturong iti laud idi kellaat a napukawan ti kontrol ti manibela a rason no apay a na-overshoot ken naidungpar iti kongkreto a poste.
Gapu iti kinapigsa ti impact ti desgrasia ket naipurwak ti driver iti lima a metro manipud iti nakaidungparanna.
Insigida a nagresponde dagiti otoridad ken naitaray ti lalaki iti ospital ngem naideklarar a dead on arrival.
Mainaig iti daytoy, inpakaammo ni P/MSgt. Eric Bumagat, Hepe ti Philippine National Police – Laoag Traffic Division a saanda a maestablisar no daytoy ket adda ti impluwensia ti nasanger idi napasamak ti desgrasia.
Naammoan a nakasuot ti protective helmet ti driver idi napasamak ti insidente.
Innayon ni Bumagat a ti nakapasamakan ti desgrasia ket agpakurba a paset ti kalsada ken dakkel ti posibilidad a napaspas ti panagpataray ti driver.
