LAOAG CITY -Inpetteng ni Senator-Judge Alan Peter Cayetano a saan a rumbeng nga ibilang a panagsayang ti oras dagiti isyu nga adda ti pakainaigan iti integridad dagiti Senator-Judges ken ti impeachment court, kalpasan ti nagbalin a rakurak ni Senator-Judge Erwin Tulfo a saan a rumbeng nga usaren ti Senate impeachment trial tapno trataren dagiti personal nga isyu dagiti senador.
Daytoy ket kalpasan ti panagpalawag ni Senator-Judge Robin Padilla iti impeachment court mainaig iti naipila a kaso nga obstruction of justice kontra kenkuana.
Segun ken ni Padilla, nakaisumitiren ti counter-affidavit sa Office of the Ombudsman mainaig iti reklamo nga inpila idi ti Tindig Pilipinas.
Kas sungbat, inbatad ni Tulfo a ti gagem ti Senate impeachment court ket usagen no adda ti pagsungsungbatan wenno awan ni Vice President Sara Duterte kadagiti reklamo a sangsangwen na, ken saan a tapno pagsaritaan dagiti personal a kaso dagiti senador.
Iti nagbalin met a rakurak ni Cayetano, naragsakan iti panangipetteng ni Tulfo iti kinapateg ti hustisya iti impeachment trial.
Nupay kasta, inpetteng na a napateg ti paset ti proseso ti panangtratar iti integridad ti korte ken dagiti huwes.
Dinakamat pay ni Cayetano dagiti nagbalin nga opinyon ti pimmusay a senador a ni Joker Arroyo ken pimmusay a Senadora a ni Miriam Defensor Santiago mainaig iti kinapateg ti kaadda ti ammo iti linteg para kadagiti legal nga isyu.
Segun ken ni Cayetano, saan a mabalin nga isina iti impeachment proceedings ti isyu ti integridad ti Korte Suprema, Commission on Elections, Court of Tax Appeals, Sandiganbayan, ken dadduma pay a korte, aglalo no adda dagiti report ti panagpangta kontra kadagiti huwes.
Inlawlawag na pay a kayat laeng ni Padilla a lawlawagan a nagtungpal daytoy iti linteg kalpasan a rimuar dagiti damag nga arigna saanna nga inkaskaso ti Office of the Ombudsman.
Kuna na nga adda ti maipagarop a naipatulod a registered mail ken email ni Padilla kas sungbat iti nasao nga opisina.
Inpaganetget ni Cayetano iti uneg ti Korte a saan a trabaho dagiti senator-judge ti manglawlawag wenno mang-prosecute iti Bise Presidente no di ket obligasyon da ti agdesisyon iti impeachment trial.
Inpasagid na pay a ti prosecution ti adda ti pagsungsungbatan na kadagiti alegasyon kontra ken ni Vice President Duterte, idinto nga obligasyon met ti defense panel nga ipakita no apay a karbengan na ti mapaawan basol.
Innayon na a ti papel dagiti senator-judge ket tingitingen dagiti ebidensya ken agdesisyon no rebbeng a ma-acquit wenno makunviktaran ti akusado.
Kabayatanna, kalpasan a nagsarita ni Cayetano ket nangipaay met ti balakad ni Senator-Judge Vicente “Tito” Sotto III nga iti laengen regular na sesyon ti Senado a trataren ti nagbalin a manipestasyon ni Padilla, kas maibasar iti 29 a tawen a kapadasan na kas agpanpanday linteg.
