LAOAG CITY – Inbilin ti Sandiganbayan ni Senador Rodante Marcoleta nga ilawlawagna iti rason no apay a saan a kasapulan a temporario nga isuspenso isuna iti puestona kas Senador kabayatan ti panagdengngeg ti kasona a plunder a naipila kontra kenkuana.
Basar iti pammilin ti korte, naipaayan ni Marcoleta ti 10 nga aldaw tapno agisubmitir ti palawagna.
Maipalagip a simmango iti arraignment ti Senador ken nangipila ti not guilty plea para iti kasona a plunder ken panaglabsing iti Presidential Decree No. 46 wenno Anti-Graft and Corrupt Practices Law no sadinno a maipawil dagiti opisial ti gobierno nga umawat ti regalo wenno aniaman a pabor gapu iti posisionda.
Immunan a nangipila ti Office of the Ombudsman ti kaso a plunder kontra ken ni Marcoleta idi Hulio 3 gapu iti maipagarup nga immawat isuna ti pakabuklan a P75 million a saan a naideklarar a donasion idi panawen a kongresista daytoy.
Sumangsango pay isuna ti sabali a kaso gapu iti panagawatna ti P25 million manipud iti negosiante a ni Joseph Espiritu no sadinno a maipawil iti babaen ti anti-gift law.
Mainaig iti daytoy, naglikudan ni Marcoleta ken Espiritu dagiti akusasion kadakuada.
Kabayatanna, nangipila met ti not guilty plea dagiti kadua ni Marcoleta nga akusado kas kada dati a Cong. Mike Defensor ken dagiti negosiante nga isuda Joseph Espiritu ken Aristotle iti arraignment-da idi Hulio 15.
