LAOAG CITY – Inrugin ti Senado ti panangtingiting iti 25 a tawen nga Electric Power Industry Reform Act (EPIRA) iti baet dagiti damag a kanginginaan iti Southeast Asia ti singir iti kuryente ti Pilipinas maisupadi iti gagem a pababaen ti presio iti babaen ti kompetision.
Inrakurak ni Sen. Erwin Tulfo, chair ti Senate Committee on Energy a gagem ti panagdengngeg idi Hulio 23 nga ammoen no natungpal ti Republic Act No. 9136 dagiti karina a benepisio wenno kasapulan nga amendaran tapno mapasayaat ti serbisio ken mapapigsa ti proteksion kadagiti consumer.
Naipatungpal idi 2001 ti Electric Power Industry Reform Act (EPIRA) tapno baliwan ken ipribado ti industria ti kuryente iti gagem a papigsaen ti competition, ipangato ti kinalaing ken pababaen ti singir.
Kabayatanna, kuna ni Tulfo nga agtultuloy a sangsangoen dagiti consumer iti nangato a mabayadan ti binulan kabayatan a mapaspasaran ti masansan a brownout iti nagduduma a siudad a naapektaran dagiti pagtaengan, negosio, pagadalan ken ospital.
Inpetteng met ni Senate President Win Gatchalian ti kasapulan ti napigpisa nga Energy Regulatory Commission (ERC) gapu ta dakkel a paset ti power generation, transmission, distribution ken retail ket iggem ti pribado a sektor iti babaen ti deregulated system.
Inrekomendarna pay a nayonan ti bileg ken resources ti Energy Regulatory Commission (ERC) tapno naiget a panangtingiting dagiti singir nga ipaspasa dagiti consumer ken ti panangngato dagiti pannusa nga agarup saan a nagbaliw manipud idi natungpal ti Electric Power Industry Reform Act (EPIRA).
Innayonna a saan paggigiddanen ti panagngato ti singir ti kuryente, presio ti gasolina ken plete a kasapulan pay a tingitingen ti Energy Regulatory Commission (ERC) ti pass-through charges tapno maliklikan a maipasa iti publiko ti sobra wenno saan a naikalintegan a gastos dagiti power company.
Kuna pay ni Senior Deputy Majority Leader JV Ejercito a nupay naipatungpal ti privatization ken competition iti babaen ti Electric Power Industry Reform Act (EPIRA), saan natungpal ti kari a panagbaba ti presio ti kuryente.
Segun iti Senador, bumasbassit ti budget dagiti pamilia para iti taraon, salun-at ken edukasion gapu iti nangato a singir ti kuryente.
Mainaig iti daytoy, mapilpilitan dagiti negosio nga ipasa kadagiti consumer ti nayon nga operating costs kabayatan a kumapkapsot ti competitiveness ti pagilian iti Southeast Asia.
Kabayatanna, tingitingen ti Senado dagiti posible nga amendaran iti Electric Power Industry Reform Act (EPIRA), bileg ti Energy Regulatory Commission (ERC) ken dagiti addang tapno pagbalinen a natalek ken nalaka ti serbisio ti kuryente.
