LAOAG CITY – Impakaammo ni Mrs. Mary Joan Pasiqui, Officer in Charge ti City Social Welfare and Development iti siudad ti Laoag nga umabot ti 125 a pamilia a 4Ps wenno Pantawid Pamilyang Pilipino Program beneficiaries ditoy siudad ti Laoag ti balligi a nagturpos.
Inbatadna a ti naiwayat a graduation program dagiti pamilia ti 4 Ps ket nagbalin a testamento iti kinapintas ken kina-epektibo ti programa ti gobierno babaen ti Department of Social Welfare and Development Office a mangitag-ay ti panagbiag dagiti pamilia nga agkasapulan ti tulong pinansial.
Segun kenkuana, ti panagturpos dagiti beneficiaries ket maysa a kapatgan nga aldaw para kadagti 4Ps beneficiaries gapu ta daytoy ti mangpaneknek a nalasatanda dagiti rigat ken sakripisio a nagdalananda.
Iti baet daytoy, ti nasao a graduation ceremony ket inamatangan dagiti opisiales ti Department of Social Welfare and Development Office ti Region 1, Department of Social Welfare and Development ditoy probinsia ken dagiti sumagmamano a lider ti siudad ti Laoag
Kabayatanna, makikaykaysa met ni Laoag City Mayor iti balligi a panagturpos dagiti benepisiario ken kinunana a sisasagana ti lokal a gobierno a tumulong kadagiti pursigido a makalasat iti rigat ti panag-biag.
