LAOAG CITY – Agsubli ti Alas Pilipinas Women indoor volleyball team iti Asian Games iti umuna a gundaway kalpasan idi 2018.
Nupay kasta, iti panagsabak dagiti Pinay spikers iti 20th edition idiay Aichi-Nagoya, Japan inton Setiembre ket insigida a naikabilda iti maaw-awagan a ‘Group of Death.’
Makadua ti Alas Women iti Pool B ti nine-time Asian Games champion China ken Kazakhstan a runner-up iti Vietnam iti 2024 AVC Nations Cup a naisayangkat idiay Manila.
Manarimaan ti panagsanay dagiti Pinay spikers iti panangidaulo da team captain Jia De Guzman, Eya Laure, Bella Belen, Erika Santos, Alyssa Solomon ken Angel Canino.
Ni Japanese coach Taka Minowa ti mangtarabay iti Alas Women a naudi a nakaay-ayam iti Asian Games idi 2018 idiay Jakarta, Indonesia a naglippas iti maikawalo a puesto.
Sumabak ti women’s tournament iti Aichi-Nagoya Asiad inton Setiembre 16 agingga 22.
