LAOAG CITY – Inrakurak ti Bases Conversion and Development Authority (BCDA) a sumurok 130,000 nga high-quality jobs para kadagiti Pilipino ti mabalin a mapartuat manipud iti gakat a Pax Silica development iti New Clark City kabayatan a maiyur-urnos ti pagilan kas hub para iti advanced manufacturing.
Inbatad ni Bases Conversion and Development Authority President and Chief Executive Officer Joshua Bingcang a ti US-led initiative ket mabalin a makagutigot ti US$40 billion agingga US$70 billion nga investments iti kanito a fully developed, makapartuat ti naruay nga oportunidad para kadagiti Filipino engineers, researchers, computer science graduates ken dadduma pay nga highly skilled professionals tapno maitandudo ti trabaho dagitoy iti pagilian.
Ti Pax Silica ket maysa a gakat nga high-tech manufacturing ken innovation hub iti babaen ti Luzon Economic Corridor a gagem a papigsaen ti supply chain para iti artificial intelligence (AI), semiconductors, critical minerals, electronics ken data centers.
Karaman ti Pilipinas kadagiti sumagmamano a pagilian a maibilang a “trusted partners” ti Estados Unidos.
Nakikadua ti Pilipinas iti Pax Silica coalition idi Abril kas 13th member a sipud idin ti koalision ket limmawa iti sumurok 30 a nakipaset a pagilian.
Sakup ti nailungalong nga industrial estate ti 1,620 nga ektaria iti uneg ti 9,450 nga ektaria iti New Clark City.
