LAOAG CITY – Nadismaya ti maysa nga agpanpanday linteg kalpasan a saan a nadakamat ni Presidente Ferdinand Marcos Jr. iti maikalima nga State of the Nation Address na ti maipanggep ti nailungalong a 200-Peso wage hike ken ti pannakaipababa ti Value Added Tax (VAT) manipod iti 12% ket mapagbalin a 10%.
Inbatad ni Akbayan Party List Representative Percival Cendaña a ti nadakamat nga addang ni Presidente Marcos Jr. iti State of the Nation Address na ket ababa laeng ken saanna a naibaga dagiti kangrunaan a solusyon tapno masolbar ti agtultuloy a panagngato ti presyo dagiti taraon ken basic commodities.
Nupay kasta, kuna na nga agtultuloy ti pannakilaban da kadwa da dagiti mangmangged tapno mapagablin a linteg dagiti nailungalong a gakat.
Uray ni Senior Citizens Party List Rep. Rodolfo “Ompong” Ordanes ket maladingitan gapu ta saan a nadakamat ti presidente ti nailungalong nga universal social pension para kadagiti senior citizens.
Inlawlawag na a saanda a babalawen ti presidente ngem ketdi ti laeng kalikagom da ket maipaayan ti nalawlawag nga addang dagiti arapaap ken kasapulan dagiti nataengan a Pilipino.
Innayon na kas mangibagi kadagiti nataengan ket agtultuloy ti pannakitinnulong da iti administrasyon iti panangilungalong kadagiti gakat ken programa a mangipaay ti naluklukay ken napinpintas a panagbiag iti tunggal senior citizen iti pagilian.
