LAOAG CITY – Mamati ni Vice President Sara Duterte a ti State of the Nation Address (SONA) ni Presidente Ferdinand “Bongbong” Marcos Jr. ket maysa a “waste of time” wenno panagsayang laeng ti oras para kadagiti Pilipino.
Kunana a saan daytoy a nagbuya ti State of the Nation Address (SONA) kas ti napalabas a tawen ken awan planona a basaen ti naglaon ti SONA wenno pakabuklan ti panagbitlana gapu ta mamati isuna a panagsayang laeng ti oras daytoy.
Dinakamatna dagiti nagbalin a damag nga adda maibalod sakbay ti umay a paskua partikular dagiti miembro ti Kamara no sadinno a saan met a napasamak.
Inabatadna nga adda personal a katulaganda ken ni Marcos sakbayda nga agpaidasig nga agkadua ngem saan a tinungpal ti Presidente.
Kabayatanna, daytoyen ti maikatlo nga agsaruno a tawen a saan a nag-atendar ti Vice President ti State of the Nation Address (SONA) ni Presidente Marcos Jr.
