LAOAG CITY – Inyuswat ti Department of Education Schools Division Office (SDO) Laoag City ti M7X Ready Program a mangisagana kadagiti mangisursuro, personnel ken dagiti agad-adal no adda mapasamak a magnitude 7 wenno napigpigsa pay a gingined.
Segun ken ni Dr. Joan Corpuz, Schools Division Superintendent ditoy ciudad ti Laoag a ti M7X Ready Program ket maipanggep iti panangisuro kadagiti eskuela iti umno a panagtignay ken panagsagana iti panawen ti napigsa a gingined, a maawagan a “The Big One,” ket gaem daytoy a programa tapno mapabassit ti peggad ken maprotehiran ti biag nga adda iti uneg ken ruar dagiti pagadalan.
Kalpasan ti rollout, maiwaras dagiti naadalda ken modules babaen kadagiti Administrative Officers ken Project Development Officers a nagatendar iti nasao nga aktibidad, tapno maipatungpal met iti amin a pagadalan ditoy ciudad ti Laoag.
Kabayatanna, kunana a no pay saan nga ammo ti eksakto nga aldaw ti nasao a napigsa a gingined ket kunana a napateg ti panagsagana ken pannakaammo dagiti ubbing kadagiti umno nga aramiden iti oras ti didigra.
