LAOAG CITY – Nagyaman ni Mr. Antonio Sebastian Bise Presidente ti Sta. Rosa Farmers Association iti siudad ti Laoag mainaig iti insigida a pannangtarimaan ti National Irrigation Administration iti solar water system-da.
Segun kenkuna, kalpasan ti pannakainterview-da mainaig iti panagkiddawda a matarimaan ti nasao a water system ket aktwal dagiti biang ti National Irrigation Administration ti nangtariman iti nasao a solar water system.
Inbatadna, kalpasan ti panangtarimaan ti NIA ket awanen ti nagbalin a problema a napasaranda iti nasao a water system.
Kinunana a ti solar water system-da ket kabaelanna a supplyan ti 40 nga ektaria a daga.
Gapu iti daytoy, ginutigot ni Mr. Sebastian dagiti kakaduana a mannalon nga agtitinnulongda iti panangtagiben ken ti panangipadanun ti problema ken dagiti kasapulanda no makapasarda ti panagperdi dagiti ramitda a masapol iti panagtalonda.
