LAOAG CITY – Kinumpirmaran ti Department of Education (DepEd) a nadadael ti 2,424 a classroom gapu iti iduduprak ti Bagyo Maymay ken angin habagat.
Basar iti datos ti Disaster Risk Reduction and Management Service ti Department of Education, adda ti 403 ti nadadael, 505 ti nakaro a nadadael idinto a 1,516 ti minor damage.
Nairekord dagiti nadadael a classroom iti Ilocos Region, Cordillera Administrative Region ken Central Luzon.
Malaksid iti daytoy, inpadamag ti ahensia nga adda dagiti kagamitan ti nadadael kas kadagiti tugtugaw, information and communications technology equipment units ken learning materials a nakaapektar iti klase kadagiti naapektaran a lugar.
Kabayatanna, basar iti Disaster Risk Reduction and Management Service ti Department of Education, agkasapulan ti P74 milyon a pundo para iti pannakatarimaan ti pakabuklan a 1,516 a classroom a nakapasar ti minor damage.
Kas sungbat, inbatad ni Education Secretary Sonny Angara nga irubuat ti Department of Education kabinnuligna ti Department of Labor and Employment (DOLE) ti pannakairaman ti 2026 Tulong Panghanapbuhay sa Ating Disadvantaged Workers-Brigada Eskwela iti immediate disaster cleanup mechanism para iti pannakaiyurnos kadagiti naapektaran a classroom.
Immuna iti daytoy, nasuspenso ita a Lunes dagiti klase iti naruay a lugar iti pagilian gapu iti panagtudtudona a mangitunda ti nalawa a layus.
