LAOAG CITY – Mangputar ti maysa nga ordinansa ni Vice Mayor Remigio Medrano tapno maliklikan ti pannakadadael dagiti parke iti ili ti Sarrat.
Daytoy ket kalpasan a naobserbaranda nga adu kadagiti agtutubo ti agar-aramid ti pannakadadael kadagiti parke pakairamanan ti Bitanga park a kukua ti lokal a gobierno.
Karaman kadagiti naobserbaranda ket ti vandalism ken littering wenno pannakaiwarang dagiti basura iti lugar.
Segun ken ni Vice Mayor Medrano, dakkel ti epektona daytoy iti turismo iti ili aglalo no saan a makontrol dagitoy a problema ket agtinnag a masayang dagiti gastos ti gobierno a papintasen dagiti parke.
Inbatadna nga addanto ti ipasada nga ordinansa tapno mapatawan ti pannusa dagiti maduktalan ken mapaneknekan nga agsalungasing iti linteg. Mainaig iti daytoy, karaman pay iti ordinansa ti pannakailatang ti pundo para iti pannakaimuntar ti Closed Circuit Television wenno CCTV camera tapno maammoan no siasinno dagiti adda iti likudan ti vandalism ken littering.
