LAOAG CITY – Inlawlawag ti kampo ni Vice President Sara Duterte a saan a pangta ti nagbalin a rakurakda nga agbalin nga agpada ti kasasaad dagiti dadduma pay nga impeacheable official, pakairamanan ti Presidente, no mabalin a makasuan ken usigen ti maysa a nakatugaw a bise presidente.
Daytoy ti nagbalin a sungbat ti kampo ti bise presidente iti rakurak ni Palace Press Officer Claire Castro, a nagsaludsod no adda manen ti baro a panagpangta ti kampo ni Duterte.
Segun iti legal counsel ni VP Sara iti kaso a grave threats a ni Atty. Paul Lawrence Lim, “statement of fact” laeng daytoy ken saan a pangta.
Inpettengna a no mabalin a maipilaan ti kaso ti bise presidente ket mabalin met a mapasamak daytoy kadagiti impeachable officials.
Immunan nga kiniddaw ti kampo ni Duterte ti panangibasura ti grave threat cases gapu iti maipagarup kinaawan ti hurisdiksion ti korte no sadinno ket nangipilada ti mosion tapno maitantan ti arrest warrant bayat ti panagururay ti desision ti hurisdiksion.
