LAOAG CITY – Kinumpirmaran ti Malacañang ti panag-resign ti dua nga undersecretaries manipud iti Department of Health (DOH).
Segun kenni Palace press officer a ni Atty. Claire Castro, a nagikkat iti puesto isuda Randy Escolango ti Undersecretary for Financial and Supply Chain Management Services ken Dr. Glenn Mathew Baggao Undersecretary for Universal Health Care-Health Services Cluster Lead para iti Luzon.
Innayonna nga agpada a sangsanguen dagiti opisyal ti reklamo a naipila iti Office of the Ombudsman.
Ni Baggao, a nadutokan a kas Health Undersecretary para iti Public Health Service Cluster idi 2024, ket naipasango iti graft complaints nga inpila ti grupo a “Concerned Health Workers” idi napan nga Abril.
Imbatad ti grupo a sinalungasing ni Baggao ti Anti-Graft and Corrupt Practices Act kalpasan a nakaala ti kabsatna kadagiti proyekto ti imprastruktura a pakairamanan dagiti proyekto iti ospital nga aaddaan gatad a P140 milion bayat ti panagtakemna.
Kabayatanna, naipasango ni Escolango iti reklamo a kaduana ni dati a Health Secretary Teodoro Herbosa idi napan a Hunio maipapan kadagiti pannakadutok kadagiti kangrunaan a posision a maipagarup a nangliklik kadagiti “standard fiscal checkpoints.”
