LAOAG CITY – Dinutokan ni Commission on Elections (COMELEC) Chairman George Erwin Garcia ti Philippine National Police (PNP) ken ti Armed Forces of the Philippines (AFP) a mangisayangkat ti imbestigasion mainaig iti panagtambang iti convoy ni Bangsamoro Autonomous Region in Muslim Mindanao (BARMM) interim Chief Minister Abdulraof Macacua.
Inbatad ni Garcia a gagemda a mapagsungbat no siasinno ti adda iti likudan ti nasao nga insidente.
Inlawlawagna nga adda man ti pakainaiganna daytoy iti eleksion wenno awan ket napateg a mapagtalinaed ti linak, urnos ken talna iti lugar.
Napateg a masigurado ti kinatalged ti tunggal tao ken agturay ti panagrespetar iti constitutional right a nakailanad iti linteg.
Maipalagip a tinambangan ti convoy ni Macacua idi Agosto 15 nga agturong daytoy iti Cotabato City ken aggapu daytoy iti Maguindanao del Norte.
Nagatendar ni Macacua iti maysa a taripnong ti Bangsamoro Federalist Party.
Kabayatanna, naisalakan ni Macacua kalpasan a saan dagitoy a nagsardeng agingga nakasangpet iti Bangsamoro Government Center idiay Cotabato.
