LAOAG CITY – Saan nga inaprobaran ni Presidente Ferdinand Marcos Jr. ti maibagbaga a “leadership fund” iti Department of Public Works and Highways para kadagiti agpanpanday linteg.
Inbatad ni Palace Press Officer Claire Castro a kuna mismo ni Marcos a saanna a pulos nga inbilin ken ni dati a Department of Public Works and Highways (DPWH) Secretary Manuel Bonoan ti panangbukel ti nasao a pondo.
Inlawlawagna a ti pammilin ti Presidente ken ni Bonoan ket siguradoen a maus-usar ti pondo kadagiti proyekto a kasapulan dagiti komunidad a saan ketdi a para kadagiti sumagmamano nga opisial.
Kuna ti Palasyo nga awan iti nailian a pondo ti maaw-awagan a “leadership fund,” a kinumpirmaran ti Department of Budget and Management (DBM) ken economic team.
Inpetteng ni Castro a no adda man ti napagsasaritaan maipanggep iti daytoy iti uneg ti Department of Public Works and Highways, saan daytoy a nagbalin a programa wenno pammilin ti Presidente.
Kagiddan kadagiti alegasion ti iregularidad iti Department of Public Works and Highways, insigida nga inbilin ni Marcos ti imbestigasion tapno maduktalan dagiti adda iti likudan iti daytoy.
