LAOAG CITY – Suportado ti Senado ti maysa a gakat a mangdusa kadagiti haealth care facilities a mangipawil kadagiti pasiente nga agawid a saanda pay nabayadan ti medical bills-da.
Ti Senate Bill No. 1511, wenno ti Enhanced Anti-Hospital Detention Act, ket kalikagumna a dagiti nakukurapay nga awan wenno kurang ti pagbayadna ket saan a mabalin nga i-hostage gapu laeng iti unpaid bills-na.
Iti salinong ti nasao a gakat, dagiti hospital directors wenno opisial a mangipatungpal ti detention policies ket agmulta ti agingga P1 million ken mabalin pay a maibalud iti agingga innem a bulan.
Inlawlawag ti principal author a ni Hontiveros a dagiti saan nga insigida a makabayad kadagiti hospital bills-da ket mabalinda a mangited ti promissory note ken agpirma iti contract of guarantee wenno agaramid ti guarantee letter iti hospital sakbayda a mabalin a ma-discharge.
Kabayatanna, segun ken ni Senator Erwin Tulfo, co-author ti Enhanced Anti-Hospital Detention Act a nabukel ti nasao a gakat gapu kadagiti padas dagiti sumagmamano a nakukurapay a Pilipino a mapilitanda nga ibati dagiti annakda iti hospital wenno saanda a maiyawid dagiti natay a kapamilyada gapu iti kinaawan ti pagbayadda.
