LAOAG CITY – Naikeddeng nga agsublin iti New York ni Filipina tennis sensation Alex Eala para iti maikadua a serrek-na iti main draw ti maisangsangayan nga US Open.
Manarimaan nga adda iti maika-20 a puesto iti world rankings ti agtawen 21 nga atleta, banag a nangikabil kenkuana ti napintas a posision tapno agbalin a seeded player iti women’s singles division ti nadakamat a Grand Slam tournament.
Maipalagip a nakaaramid ti pakasaritaan ni Eala ti agpada a torneo idi napalabas a tawen kalpasan a nagbalin kas kangrunaan a Pilipino a nangabak ti laban iti Grand Slam main draw iti babaen ti pannakangabakna kontra ken Clara Tauson iti opening round.
Malaksid ti balligina iti professional circuit, nagbalin pay a pakasaritaan ti New York para kenkuna idi 2022 idi nagkampeon daytoy iti girls’ singles event kalpasanna nga inatiw ni Lucie Havlickova iti finals.
Kabayatanna, sumrek ni Eala iti kompetision nga adda bitbitna a napintas a momentum manipud iti North American Swing-na, pakairamanan ti pannakangabakna ti kangrunaan a WTA title iti Mubadala DC Open ken ti nagballigi a kampaniana iti Canada ken Cincinnati.
Naamoan a lumaban pay ti Pinay tennis star iti mixed doubles tournament no sadinno kaduana ti world no. 4 a ni Felix Auger-Aliassime.
