LAOAG CITY – Nagballaag ti Philippine Coast Guard (PCG) District North Eastern Luzon kadagiti marino, mangngalap ken publiko nga agannad iti naikeddeng a pannakayuswat ti Long March-5 rocket ti China inton Lunes, Agosto 24, 2026.
Isayangkat daytoy iti alas-8 ti bigat agingga alas-9:11 ti bigat iti Philippine Standard Time manipud iti Wenchang Space Launch Site iti Hainan, China.
Basar iti Philippine Space Agency (PhilSA), manamnama nga agtinnag dagiti dadduma a partes ti rocket iti dua a naipasdek a drop zones nga adda iti uneg ti Exclusive Economic Zone (EEZ) ti pagilian.
- Drop Zone 1: sumurok-kumurang 67 nautical miles manipud Burgos, Ilocos Norte; 89 nautical miles manipud Vigan, Ilocos Sur; ken 97 nautical miles manipud Dalupiri Island, Cagayan.
- Drop Zone 2: sumurok-kumurang 148 nautical miles manipud Santa Ana, Cagayan; ken 169 nautical miles manipud Babuyan Island.
Nupay nababa ti tsansa ti insidente wenno pannakadadael manipud iti rocket debris, inallukoy ti Philippine Coast Guard dagiti amin a bangka ken barko nga liklikan dagiti drop zone kabayatan ti maiyuswat a rocket launch ken suroten dagiti safety measure.
Kabayatanna, agtultuloy ti panag-monitor ti Philippine Coast Guard ti sasaaden ken panangkomunikar kadagiti maseknan nga ahensia tapno masigurado ti kinatalged ken seguridad iti kabaybayan.
