LAOAG CITY – Naarestar ti maysa wanted person iti ili ti Bacarra.
Ti suspek ket agtawen ti 33, naasawaan, maysa a negosiante ken residente ti Brgy. Cabaruan, Bacarra, Ilocos Norte.
Ti pannaka-arestarna ket babaen ti naidasar a warrant of arrest nga inparuk-at ni Hon. Bonhoefer Vergara Bernardez, Presiding Judge, Family Court, First Judicial Region, Branch 4, Laoag City, Ilocos Norte gapu iti 2 dua a bilang a panaglabsingna ti Republic Act 9262 wenno ti Anti-violence against women and their children.
Ti pannakaarestarna ket bebaen ti pannakibinnulig dagiti personnel ti Bacarra Municipal Police Station kas lead unit, 1st Provincial Mobile Force Company (PMFC), PNP Investigation and Detection Management Unit (PIDMU),101st Regional Mobile Force Battalion ken ti Police Intervention Unit.
Kalpasan ti pannakaarestar ti suspek ket naikabil daytoy iti Bacarra Municipal Health Office para iti medical examination ken kalpasan ti nasao a medical examination-na ket naikabil daytoyen iti Bacarra Municipal Police Station para iti naan-anay a dokumentasion sakbay maisubli daytoy iti korte a naggapuan ti arrest warrant.
Kabayatanna, narekomendaran ti suspek ti piansa a Php 5,000 iti tunggal kaso para iti temporario a pannakawayawayana.
