LAOAG CITY – Nilukatan ti gate ti Ambuklao, Binga ken Ipo Dam iti Luzon tapno agsellaag ti danum ita nga aldaw ti Lunes, Agosto 31 gapu iti napigsa a tudo gapu iti habagat iti kallabes.
Basar iti datos ti Philippine Atmospheric, Geophysical and Astronomical Services Administration, walo a gate ti nakalukat iti Ambuklao Dam iti Benguet nga addan ti sag-5 meters ken nangsellaag ti 644.24 cubic meters per second (cms) a danum.
Idi Domingo, uppat a gate laeng ti nakalukat.
Innem a gate met ti nakalukat iti 6 a metro ti Binga Dam iti nadakamat a lugar nga nangsellaag ti danum iti 410.40 cubic meters per second (cms).
Kabayatanna, ti Ipo Dam iti Norzagaray, Bulacan ket adda maysa a gate a nakalukat iti 0.15 a metro a nagsellaag ti 34.20 cubic meters per second (cms).
Binalakadan dagiti residente nga asideg iti lugar ken dagiti dalanan a karayan nga agridam iti posible a panagngato ti lebel ti danum.
