LAOAG CITY – Umaboten iti P5.5 million ti nadadael iti imprastraktura ken idinto a P78,450 ti balor ti nadadael iti sektor ti agrikultura pakairamanan ti P65,450 a nadadael a mula ken P13,000 kadagiti taraon iti ili ti Currimao.
Daytoy ti impakaammo ti Local a gobierno iti ili ti Currimao kalpasan ti nairekordda a 24 a mannalon ken 2 a livestock raisers ti naapektaran gapu iti agtultuloy nga epekto ti Habagat.
Gapu iti daytoy, inbatad ti lokal a gobierno iti nasao met laeng nga ili ti pannakaisaganada iti aniaman a maawatda a report wenno insidente mainaig pay laeng iti saan a napintas a sasaaden ti panawen gapu iti Habagat.
No man pay awan ti nairekordda nga aniaman nga insidente a pannakadadael kadagiti pagtaengan ken kadagiti nagbakwit, ket impasiguradoda ti agtultuloy a panag-monitor-da bayat ti iduduprak ti nakaro a panaglayus ditoy probinsia.
Nupay kasta, nakasagana dagiti relief goods ken rescue equipments para iti panagsagsaganada iti aniaman a kanayunan nga epekto ti agtultuloy nakaro a panagtudo.
Kabayatanna, bayat iti epekto ti Habagat, nangiwayat ti lokal a gobierno ti ili ti Currimao ti relief operations no sadinno ket 400 a pamilya ken 1,286 a miembro ti naipaayanen ti relief goods iti 19 a barangays iti ili ti Currimao.
