LAOAG CITY – Dua nga insidente ti uram ti rinespondean ti Bureau of Fire Protection ditoy ciudad ti Laoag idi kalman, Agosto 31.
Daytoy ti kinumpirmaran ni Fire Inspector Edison Reyes, ti Fire Marshall iti Bureau of Fire Protection ditoy ciudad ti Laoag.
Inbatad ni Reyes nga immuna a rinespondean da ti napasamak nga uram iti maysa nga apartment iti Sitio 2, Barangay 50, Buttong ditoy ciudad ti Laoag.
Kuna na a maysa laeng a kwarto iti nasao nga apartment ti naapektaran no sadinno nga iti imbestigasyon da ket namonganay ti apoy manipod iti nabasa a convenience outlet.
Inlawlawag ni Reyes a possible a gapu iti kinapigsa ti tudo idi kalman ket adda ti posibilidad na a simrek ti danom iti tawa nga asideg ti outlet.
Innayon na a basar iti imbestigasyon da ket mapatta-patta a sumuruk-kumurang a 25 ribo a pisos ti balor dagiti nadadael iti napasamak nga uram, no sadinno a ti laeng nauram ket ti foam, dagiti pungan ken ules ti agnanaed iti nasao a kwarto.
Kabayatanna, inpakaammo met ni Reyes nga iti napasamak nga uram iti Brgy. 11 ditoy ciudad ti Laoag ket nakairamanan ti maysa a balay no sadinno a ti kangrunaan a nauram ket ti maysa kwarto iti maikadwa a kadsaaran nga agserserbi a pagipenpenan da ti gamit.
Kuna ni Reyes nga iti met imbestigasyon da ket makita iti tawa a simrek met ti danom gapu iti napigsa a tudo a nangitunda ti pannakabasa ti convenience outlet, nga isu met ti makitkita da a rason iti napasamak nga uram.
Umabot met iti agarop 30 ribo a pisos ti balor dagiti nadadael iti insidente.
