LAOAG CITY – Inpakaammo ni Mrs. Janet Retamal, ti mangidadaulo iti Population and Development Office ditoy siudad ti Laoag a ti kangrunaan a pakairek-rekordan da iti teenage pregnancy ket dagiti adda iti nababa a sektor iti panagbiagna wenno dagiti benepisyaryo ti Pantawid Pamilyang Pilipino Program (4Ps).
Gapu iti daytoy, kuna ni Retamal nga agtultuloy ti panangiyuswat da ti seminar mainaig iti panangipatungpal ti family planning ken ti responsible parenthood iti amin a barangay ditoy ciudad.
Segun kenkuana, umabot iti 1,600 a miembro ti Pantawid Pamilyang Pilipino Program ditoy ciudad ti Laoag ti nabenepisyaran iti nasao a programa.
Kabayatanna, kuna ni Retamal a dakkel ti responsibilidad dagiti nagannak iti panangpadakkel a nasayaat kadagiti annak tapno saan a sabali a direksyon ti masurot da.
Innayon na a napateg iti pannakaipaadal kadagiti nagannak ken annak iti panagbalin a responsable gapu ta daytoy iti maysa a wagas tapno agballigi da iti panagbiag.
Maipalagip nga immuna nga inbatad na ni Retamal a maibasar iti rekord iti opisina da ket bimmasit ti bilang dagiti teenage mother no ikumpara kadagiti naglabas a tawe, ngem bumabbaba met ti tawen tawen dagiti nasapa nga agsiksikog.
