LAOAG CITY – Impakaammo ni Mayor James Bryan Alcid a ti maysa kadagiti rason iti agtultuloy a pannakaipaay ti closure order kadagiti sumagmamano a pasdek negosio ditoy siudad ti Laoag ket ti kinaawan ti building ken sanitary permit dagitoy.
Daytoy ket kalpasan a naduktalan ti Business Permit and Licensing Office (BPLO) ti kinaawa ti permit dagiti sumagmamano a pasdek negosio iti siudad.
Inbatad ni mayor Alcid a no mangipasdek ti negosio ti maysa nga indibidual ket kasapulan nga adda dagiti requirements a kasapulan kas koma iti building ken sanitary permit ken nagduduma pay.
Kunana nga awan ti rason a saanda a makaala kadagiti maseknan nga opisina gapu ta no kompleto dagiti papeles wenno dokumento ket awan ti agbalin a problema dagitoy.
Kabayatanna, inallukoyna dagiti addaan ti pasdek negosio wenno planona ti agpatakder a dumalan iti umno a proseso tapno awan ti agbalin a problema dagitoy wenno saanda a maipaayan ti closure order.
Maipalagip nga iti laeng kallabes ket naiget ti panag-monitor dagiti kameng ti Business Permit and Licensing Office (BPLO) kadagiti pasdek negosio tapno masigurado a legal ken kompleto ti papeles dagitoy ditoy siudad ti Laoag.
