LAOAG CITY – Inlawlawag ti Department of Budget and Management a saan nga otomatiko a maibilang kas ‘budget cut’ no ti kiniddaw a pondo ti maysa nga ahensia ket nababbaba ngem iti naaprubaran.
Naamoan nga umabot iti 12 trillion a pisos ti maipagarup a pakabuklan a budget proposal dagiti ahensia no sadinno sumurok 643 biliion a pisos ti nailatang ti Department of Public Works and Highways iti babaen ti 2027 National Expenditure Program.
Pakairamanan kadagiti major infrastructure flagship projects ket ti paset ti Pasig-Marikina Channel Investment Project ken dadduma pay para kadagiti lugar iti pagilian.
Kabayatanna, iti panagtratar iti kallabes ti Senate Committee on Finance, nadakamat ti sumagmamano a flood control projects iti Metro Manila a nagbalin nga epektibo iti panagsungbat ti problema iti layus.
Mainaig iti daytoy, dinakamat ni Senador JV Ejercito a nagbalin nga epektibo ti panagsungbat ni Navotas City Rep. Toby Tiangco iti panaglayus ti siudad nupay 70% ti Navotas ket adda iti below sea level.
Karaman kadagiti epektibo a proyekto ket ti coastal dike, navigational gate ken network dagiti pumping station iti siudad tapno makontrol ti layus.
