LAOAG CITY – Nangiyallokar ti Philippine Crop Insurance Corporation (PCIC) ti P187 million nga agserbi kas tulong kadagiti insured farmers a naapektaran ti nakaro nga epekto ti Habagat ken kadagiti naglabas a bagyo Luis, Maymay ken Neneng.
Ti nasao a payouts ket agserbi kas tulong para kadagiti nairekord a pannakalugi manipud idi Agosto 1 agingga 26, 2026 kadagiti walo a rehiyon, a pakabukelan dagiti 24,987 a mannalon a mabenepisiaran.
Mainaig iti daytoy, basar iti Philippine Crop Insurance Corporation (PCIC), dagiti rice farmers ti naiyallokaran ti kadakkelan a porsion ti nasao nga insurance payouts, no sadinno ket umabot daytoy iti P132.9 million, dagiti agmulmula met kadagiti high-value crops iti nasao a walo a rehiyon ket naiyallokaran ti P42.1 million ken idinto a dagiti corn farmers met ket addaan ti P9.3 million.
Kabayatanna, basar iti kamaudian a nairekord ti Department of Agriculture’s (DA) Disaster Risk Reduction and Management Operations Center idi Setiembre 6 ket ti pakabukelan a gatad ti pannakadadael iti sektor ti agrikultura gapu kadagiti weather disturbances ket umaboten iti P4.13 billion.
Manipud kadagiti nairekord ti Departamento, 97,589 a mannalon ken mangngalap iti 81,383 nga hektaria ti naapektaran, ken idinto a ti production losses met ket dimmanonen iti 100,602 metric tons.
Mainaig kadagitoy a bilang, dagiti pagay ti naruay a nairekord a naapektaran nga aggatad ti pannakadadaelna iti P2.04 billion a pannakalugi.
