LAOAG CITY – Agtultuloy ti panagwaras ti African Swine Fever (ASF) outbreak ditoy pagilian kalpasan a pinasingkedan ti Department of Agriculture (DA) a 92 a barangay ti naapektaran iti nasao a sakit kadagiti baboy.
Segun kenni DA Assistant Secretary Arnel de Mesa, ti panagadu ti bilang ket gapu iti agtultuloy a panagwaras ti virus kadagiti lugar nga addaan iti aktibo a kaso, kasta met dagiti baro a kaso a nairekord iti sumagmamano a rehion.
Agtultuloy ti pannakitinnulong ti ahensia kadagiti lokal a gobierno tapno ma-monitor ken malappedan ti panagbakwit wenno iseserrek dagiti apektado a baboy.
Nainget ti panangipatungpal ti DA kadagiti quarantine checkpoints ken ti pannakaiparit ti pannakaibiahe dagiti sibibiag a baboy, nga awan dokumentona a karne, ken produkto ti karne ti baboy manipud red zones nga agturong kadagiti natalged a lugar.
Nabalakadan met dagiti hog raisers ti naiget a panang-implementar dagiti biosecurity measures kadagiti bukodda a pen, kas iti regular a disinfection ken panangiparit iti iseserrek dagiti di autorisado a tattao.
Iti agdama, ipatpatungpal ti DA ti targeted culling wenno killing dagiti baboy iti uneg ti maysa a kilometro a radius manipud iti naapektaran a talon tapno malapdan ti ad-adda pay a panagwaras ti virus.
Inawagan pay ti gobierno ti publiko ken dagiti agtartaraken iti baboy nga insigida nga ireportda iti munisipyo wenno opisina ti agrikultura ti aniaman a naisangsangayan a sintoma wenno kellaat nga ipapatay dagiti baboyda.
