LAOAG CITY – Inarestar dagiti otoridad ti uppat a lallaki gapu iti illegal a panagsusugal da iti maysa a minatayan iti Barangay Catangraran iti ili ti Solsona.
Basar iti Philippine National Police iti ili ti Solsona, dagiti suspek ket agpapada nga addan iti umno a tawen ken residente amin dagitoy iti nadakamat a barangay.
Inbatad ti Philippine National Police a nakaawat da ti report nga adda ti agsusugal iti lugar ken iti panagresponde da ket naaktwaran da dagiti suspek nga agay-ayam ti “Bet Game”.
Nakumspiskar dagiti otoridad iti lugar ti maipagarop a pusta dagiti suspek a P2,250.00; maysa a set ti Blue playing card; maysa a plastic a lamisaan; maysa a table mantel; 10 a monoblock chairs; maysa a bassit a plastic container.
Naikabil dagiti suspek iti Piddig District Hospital para iti medical examination ken kalpasan na ket naipan dagitoy iti Philippine National Police kabayatan a maiyur-uray ti pannakaipila ti kaso a panaglabsing ti Republic Act 1602 wenno illegal a panagsusugal kontra kadakuada.
