LAOAG CITY – Manamnama a maipatungpal ti “Public Private Partnership” wenno PPP para iti panagoperar ti “Materials Recovery Recycling Facility” a naiyestablisar idiay Brgy. Imelda iti ili ti Marcos, Ilocos Norte.
Daytoy ket kalpasan nga impakaammo ni Provincial Administrator Atty. Yvette Leynes ken ni Governor Cecilia Araneta Marcos a silulukat ti Department of Environment and Natural Resources wenno DENR para iti nasao a kalikagum.
Inlawlawagna a maysa ti nasao a pasilidad ti probinsia kadagiti kangrunaan a naidasar iti pannakitaripnongda iti regional office ti DENR.
Impakaammona nga inlungalong ti DENR a mangisayangkat ti Environmental Management Bureau wenno EMB ti re-assessment no tarimaanen ti Provincial Engineering Office dagiti ramit kalpasan nga impadanonna a nupay nabayagen a naiyestablisar ti pasilidad ket saan pay daytoy a nagoperar.
Nupay kasta, inbatad ni Mr. Joegie Jimenez, senior environmental program officer ti Environment and Natural Resources Office wenno ENRO ti PGIN nga iti pannakaipadas dagiti makina ket natakuatanda a saan a nasayaat ti angot ti asuk dagiti mapuuran a plastik ken nadagsen dagiti maaramid a tugaw.
Inbatadna a gapu iti daytoy ket kiniddawda iti Environmental Management Bureau a mangisayangkat ti inspeksion.
Mainaig iti daytoy, imbalakadda ti panagsurat ti PGIN kadakuada a kalikagum ti probinsia a maisubli dagiti nadakamat a makina.
Kuna ni Jimenez a kastoy ti inaramid ti probinsia ti La Union kalpasan a napasaranda ti maiyasping a situasion dagiti makina nga inpaay ti EMB kadakuada.
Pakaseknan daytoy, pinusgan ni Governor Marcos ti provincial administrator a mangaramid iti surat a maiturong iti Environmental Management Bureau.
