LAOAG CITY – Naiget a kinondenar ni Bise Presidente Sara Duterte ti napasamak a pammaltog iti Banga National High School sa South Cotabato idi Setiembre 18 no sadinno daytoyen ti kunana ti maikalto nga school schooting iti pagilian ita a tawen.
Basar iti inparuk-atna a rakurak ita nga aldaw, Setiembre 21, inbatad ni Duterte a mangipakpakita ti risgo ti naiget a sangsangoen dagiti estiduante kabayatan nga adda iti pagadalan.
Segun iti Bise Presidente, rumbeng nga agbalin a natalged ken nakappia dagiti pagadalan para kadagiti ubbing ngem kunana nga agtultuloy a risgo dagiti agtutubo gapu iti maipagarup a kinakurang ti tignay ti gobierno.
Inkonektar ni Duterte ti insidente iti ad-adda a nalawa a kasasaad ti panangidaulo iti pagilian.
Inpettengna nga imbes nga agpukos iti kangrunaan a responsibilidad ti gobierno, pakairamanan ti seguridad ken pagsayaatan dagiti Pilipino, ket ad-adda a nakapukos ti administrasion iti political consolidation.
“The Marcos administration has failed the victims and survivors of the South Cotabato tragedy,” segun ken ni Duterte.
Innayonna pay a saan laeng dagiti biktima ti nadakamat nga insidente ti rumbeng a panunoten gapu ta adu pay dagiti ubbing a Pilipino ti mabalin a maikabil iti risgo.
Kabayatanna, inpaganetget ti Bise Presidente a kasapulan laeng ti pagilian ti ad-adda a napudno a panangidaulo.
“We deserve better leadership than this,” rakurak ni Duterte.
