LAOAG CITY – Naarestar ti maysa a lalaki iti siudad ti Laoag kalpasan ti naiwayat nga anti-illegal drug buy-bust operation.
Nabigbig ti suspek nga agtawen 57 ken agtaltalinaed iti Brgy. 3 ditoy siudad ti Laoag.
Nakumpiskar manipud iti suspek ti maysa a sachet ti mapapati a shabu nga iso ti ginandatna nga ilako, maysa a transparent plastic a naglaon ti walo a sachet ti mapapati a shabu ken maysa a sachet ti maipagarup a shabu iti adda iti ikot ti suspek.
Addaan ti kadagsen a 15.5 a gramo dagiti amin a nakumpiskar a mapapati a shabu nga aggatad ti P105,400.
Malaksid kadagitoy, nakumpiskar pay manipud iti suspek ti maysa a genuine P1,000 bill a nausar kas buy-bust money, dagiti personal belongings-na ken maysa a unit ti motorsiklo nga addaan iti sidecar-na.
Kabayatanna, manamnama a sumango ti suspek iti kaso a panaglabsing iti Section 5 Article 11 ken Article 2 iti Republic Act No. 9165 wenno ti Comprehensive Dangerous Drugs Act of 2002.
