LAOAG CITY – Inbatad ni Ukrainian President Volodymyr Zelensky a pinalubosan ni United States President Donald Trump ti Kyiv nga ag-manifacture wenno agaramid ti Patriot missiles, maysa a kangrunaan a kiddaw bayat nga ikagumaan nga ibales dagiti awan inggana nga aerial attacks ti Russia.
Kunana nga immanamong ni Trump ken pinal ti desisiona nga ipaayan ti lisensia ti Ukraine nga agaramid ti nadakamat a missile.
Mainaig iti daytoy, nagkita ni Trump ken Zelensky iti sidelines ti United Nations General Assembly iti New York ita nga lawas.
Ti Patriot interceptors ket maysa kadagiti sumagmamano nga armas a kabaelanna a mangkontra iti ballistic missiles. Ngem gapu iti manarimaan a global supply crunch, naapektaran ti suplay ti Ukraine.
Ginundawayan met ti Russia ti situasion ken nangiyuswat ti sumagmamano a ballistic attacks ti Ukraine, partikular ti Kyiv, babaen ti agtultuloy nga aerial attacks iti maysa bulan.
Gapu iti kinaawan ti Patriots, narigatan ti Ukraine a mangibales ti Russia a nangitunda ti panagngato ti bilang dagiti natay a sibiliian no sadinno 5 ti pimmusay, pakairamanan ti maysa nga agtutubo, ken 31 ti nasugatan ita nga aldaw ti Biernes, Setiembre 25.
