LAOAG CITY – Ginutigot ti Philippine National Police dagiti indibidual nga agtagikua ti paltog nga agbalin a responsible iti panagusar ken natalged a panagidulin dagitoy kabayatan ti tallo nga insidente ti pammaltog kadagiti pagadalan iti kallabes.
Pakairamanan kadagiti insidente ti pammaltog iti Tacloban City, Zamboanga City ken South Cotabato no sadinno naduktalan a ti agtagikua dagiti nausar a paltog ket dagiti nagannak wenno kabagyan nga empleado iti gobierno dagiti suspek a menor-de-edad.
Gapu iti daytoy, inyuswat ti Philippine National Police Civil Security Group ti nationwide “Gun Safety Advocacy Campaign” tapno itandudo ti responsable a panagtagikua, umno a panagidulin ken natalged a panagiggem ti paltog, pakairamanan payen iti pananglapped iti saan nga otorisado a panagusar kadaytoy.
Mainaig iti daytoy, dinutokan dagiti regional ken local police unit a papigsaen ti information campaign, kabayatan a mangisayangkat ti Civil Security Group ti gun safety seminars ken pannakikoordinar kadagiti stakeholder.
Kabayatanna, nangipila ni Akbayan Party-list Rep. Chel Diokno ti House Resolution No. 1468 para iti nationwide safety audit, inspeksion ken imbentario ti amin a paltog a nairuar, tagikua wenno iggem dagiti opisial ken empleado ti gobierno.
Gagem daytoy a maliklikan ti pannakaipapan iti sabali nga ima wenno indibidual dagiti paltog, mapatawan ti pannusa dagiti saan a responsible ken matingiting dagiti pagannurotan ti gobierno iti panagtagikua ti armas.
Naamoan a legal ti panagtagikua ti paltog iti pagilian ngem agkasapulan daytoy ti lisensia ken rehistro.
