LAOAG CITY – Kalikagum ti Bureau of Fire Protection ditoy probinsia ti Ilocos Norte ti naigiget a panagbantay ken panaginspeksion kadagiti pasdek negosio nga aglako kadagiti christmas lights.
Kabayatan ti umadani a paskua, ado metten dagiti establisimiento nga aglako kadagiti christmas lights a maysa kadagiti masansanen a gatgatangen dagiti Pilipino kas simbolo ti paskua.
Basar kenni FSUPT. Nemesio R. Valenciano Jr., acting provincial fire marshal iti Bureau of Fire Protection Ilocos Norte a nakaawatdan ti direktiba para iti pannakikoordinarda kadagiti pasdek negosio nga aglako kadagiti nasao a christmas lights.
Inbatadna nga addan to ti gundaway nga agbisita ken aginspeksionda no masursurot met laeng dagiti standard a kalidad ti christmas lights nga mailaklako ken kadagiti dadduma pay a dekorasion para iti paskua.
Kinunana a masapol nga addaan dagiti produkto iti Bureau of Product Standards (BPS) marking ken ti ICC markings dagiti produkto wenno dekorasion a mailako tapno maipasiguradoda kadagiti aggatang a natalged dagitoy nga alikamen a pang dekorasion.
Kabayatanna, impanamnama ti Bureau of Fire Protection ti maysa nga inspeksion ken panagbisitada iti maysa a dakkel a mall ditoy siudad ti Laoag para iti panagsagsaganada iti panang-pasilawda ken panangikabilda kadagiti dekorasion kas paset ti panagsagsagana iti paskua.
Iti agdama, agtultuloy ti pannaki-koordinarda kadagiti dadakkel a pasdek negosio tapno mapagtalinaed ti seguridad mainaig iti aniaman a mapasamak nga insidente iti ururam gapu kadagiti nadakamat a produkto.
